එල්ලෝර්

ඉන්දියාවේ මදුරාසි ප්‍රාන්තයට අයත් නගරයකි. ගෝදාවරි, කිස්ට්නා (කෘෂ්ණා) යන ගංගා සන්ධි වන ස්ථානය අසල පිහිටි මෙය වැදගත් වාරිමාර්ග පද්ධතියක මූලස්ථානයයි. මෙය උපු (ලුණු සහිත) එල්ලෝරය, රායි (ගල් සහිත) එල්ලෝරය (වෙල්ලෝර්) යනුවෙන් කොටස් දෙකකට බෙදේ. 1441 දී ජනගහනය 64,911ක් විය. මෙහි ධාන්‍ය වෙළෙඳාම විශාල වශයෙන් කරනු ලැබේ. කලාල විවීම, වෙඩි ලුණු සෑදීම සහ සම් පදම් කිරීම දියුණුවට පත් කර්මාන්තය. මෙහි අධිකරණ ආයතන ද පොලිස් ස්ථානයක් ද තොටමුණු කාර්යාලයක් ද පැරණි බළකොටුවක් ද වේ.

බලකොටුව ඉදි කරන ලද්දේ මේ අසල ම වූ බෞද්ධ වෙංගි රාජධානියට අයත් යැයි සලකනු ලබන නටබුන් ද්‍රව්‍යවලිනි. පුරාණයේ දී උත්තර සර්කාර් නමින් හඳුන්වනු ලැබ දැන් මදුරාසි ප්‍රාන්තයේ උතුරු දිස්ත්‍රික්ක සතරින් සමන්විත වූ පෙදෙසේ කෝලාර් විලට බටහිරින් පිහිටා ඇති මේ නගරය මුලින් එම ප්‍රදේශයෙහි අගනුවර ද විය.

(සංස්කරණය: 1974)