ඔආහු
ශාන්තිකර සාගරයෙහි පිහිටා ඇති හවායි දූපත් වැලේ ඉතා ම වැදගත් දූපතයි. ව.සැ. 589ක් පමණ වූ මෙය එම දූපත් අතුරෙහි විශාලත්වයෙන් තෙවැනි දූපතය. මෙහි වැසියන්ගෙන් සතරෙන් තුන් කොටසකටත් වැඩි දෙනා වාසය කරන්නේ හොනොලුලු නගරයෙහිය. හොනොලුලු නගරය පිහිටා ඇත්තේ ඔආහු දිවයිනේ අග්නිදිග පාර්ශ්වයෙහිය. ශාන්තිකර සාගරයෙහි පිහිටා ඇති, එක්සත් ජනපද රාජ්‍යයට අයත් ප්‍රධාන නාවික මධ්‍යස්ථානය වූ ප’ල් වරාය පිහිටා ඇත්තේ ද මෙම දූපතෙහිය.
මෙහි වයියනයි සහ කූලවු නමින් කඳු වැටි දෙකකි. සප්‍රාණ යමහල් නොමැති වුව ද බොහෝ මළ යමහල් මුඛ ඇත. මැනෝවා මිටියාවතෙහි හවායි විශ්වවිද්‍යාලය ද පුහාහොව් ඇකඩමිය ද මිඩ් පැසිෆික් විද්‍යායතනය ද පිහිටා ඇත. මෙම දූපතෙහි අන්නාසි හා උක් විශාල ලෙස වගා කෙරේ. එමෙන් ම මෙය සුප්‍රකට දේශසංචාරක මධ්‍යස්ථානයක් ද වෙයි.
මෙහි වයිපාහු, එවා, ආයිඒයා, කාහූකූ, වතියවා, වයිආලුආ, වයිනයි යනුවෙන් තවද ප්‍රධාන නගර කිහිපයකි.
(සංස්කරණය: 1974)
