ඔගාසාවාරා-ගුන්තෝ
(බෝනින් දූපත්). ජපානයට සැතැපුම් පන්සීයක් අග්නිදිගින් පිහිටා ඇති කොදිව් පන්තියකි. සංඛ්යාවෙන් විස්සක් පමණ වූ මේ දූපත්වල ප්රමාණය ව.සැ. 40ක් පමණ වේ. ජනගහනයෙන් වැඩි දෙනා ජපන්නුය. සෙස්සෝ බෙහෙවින් ම කොරියානු හෝ පෝමෝසා ජාතිකයෝය. දූපත් අතුරෙන් ප්රධාන වනුයේ ව.සැ. 9ක් පමණ වූ චිචිජිමා හෙවත් පීල් දිවයිනයි. මෙම දිවයින යුද්ධ කටයුතු සඳහා බෙහෙවින් ප්රයෝජනවත්ය. අගනුවර වූ ඕමුරා සහ ප්රධාන වරාය වූ පෝට් ලොයිඩ් පිහිටියේ මෙහිය.
ජපානය විසින් 1876 දී ඔගාසාවාරා දූපත් තම රටට ඈඳා ගන්නා ලදි. මෙම දූපත්වල හොඳින් වගා කළ හැක්කේ මුළු වර්ග ප්රමාණයෙන් සියයට එකොළහක පමණ ප්රදේශයක් පමණි. ඉතිරි කොටස කඳු සහිතය; වනයෙන් වැසී ඇත. දේවදාර, රෝස්වුඩ්, නා, සඳුන්, ආදි දැව වර්ග සුලභය. උක්, කෙසෙල්, අන්නාසි මේ දූපත්වල වගා කෙරේ.
දෙවැනි ලෝක සංග්රාමයේ අවසානය වනතුරු ම ජපානයේ කොටසක් වශයෙන් පැවතුණු ඔගාසාවාරා දූපත් ඉන් පසු ඇමෙරිකා එක්සත් ජනපදයේ පාලනය යටතට පත් විය. 1968 ජූනි 26 වැනි දින මෙම දූපත් ආපසු ජපානයට පවරා දෙනු ලැබීය. ජනගහනය (1940) 7,361කි. එක් දූපතක් පමණක් 1967 දී ජනාවාසව පැවති අතර එහි ජනගහනය 205ක් පමණ විය.
(සංස්කරණය: 1974)
