ඔපිසර සන්දේශය
ඇතැම් ගම්මුලාදෑනීන් කරන නොයෙක් නොපනත්කම් දක්වා එබඳු අය හැර “උගත් ශිෂ්ට මිනිසුන් ගම්මුලාදෑනිකම්වලට පත් කළ මැනැවැ”යි බෙන්තර වළල්ලාවිටි කෝරළය කරවන ගුණතිලක ගම්සභාපතිතුමාගේ මාර්ගයෙන් නිලධාරීන්ට දන්වා ලීමට ඔපිසර කෙනකු අත යවන පණිවුඩයක් ලෙස ලියන ලද උපහාස කාව්‍යයකි. විශේෂයෙන් එක් ගම්මුලාදෑනියකුට කරන ලද වාක් ප්‍රහාරයක් මෙහි දැක්වේ. සිරිරහල් හිමියන් ආදි පෙර කිවියන් ඒ ඒ සතුන් දූත මෙහෙවරෙහි යෙදූ නමුත් මෙහි ඔපිසර කෙනකු සන්දේශ භාරකයා කරන ලද්දේ ඔහු කළ අපරාධ දන්වන්නට ඔහු හැර අන් කෙනකු නැති හෙයිනැයි කියත්.
මෙය රචනා කරන ලද්දේ 1915 දී වැලිතර ඤාණතිලක නායකස්ථවිරයන් වහන්සේ විසිනි. ප්‍රමාණයෙන් පද්‍ය 215ක් වූ මේ සන්දේශයෙහි ගමන් මාර්ගය වැලිතර සිට බෙන්තර දක්වා වෙයි.
ගම්මුලාදෑනියාගේ අයුතු ක්‍රියාවලින් හටගත් අප්‍රසාදය නිසා නැගීගිය චිත්තවේගය එලෙසින් ම කවියට නැගී ගිය බවක් පෙනේ.
1915 දී කේ.ඒ.සී. මැන්දිස් නමැති වෙද මහතකු විසින් මෙය මුද්‍රණය කරවන ලද්දේය.
(සංස්කරණය: 1974)
