ඔවා සිතුමිණ
අවවාද රැසක් කවියට නඟා ලියන ලද කුඩා රචනාවකි. වෙහෙරගොඩැල්ලේ විහාරාධිපතිව වැඩ විසූ ගණාචාර්ය තලාහේනේ අමරමෝලි නම් තෙර කෙනකුන් විසින් ක්‍රි.ව. 1871 දී ලියන ලද කවි 100කින් යුත් මේ නිබන්ධයෙහි ව්‍යාසකාරය, සුභාෂිතය වැනි අවවාදාත්මක ග්‍රන්ථ ඇසුරු කොට ඊට අනුරූප වන සේ ලියන ලද අවවාද බොහෝ ගණනක් දැක්වේ. මෙහි එන අවවාද හා උපදේශයන් රසවත් උපමාවලින් සරසාලීම ද ගත්කරුවාණන්ට අභිමත විය.
“නොකා නොබී ලොබින් දන සපයන අය අතු අග පල රැක සිටින දිමියන් මෙන් ධනයෙන් පල නො ගනිති. ලොවට අවැඩ සිදු කරන මත් පැන් වෙළඳාම් කරන මිනිසා සුරා නොව ලොවට නපුර විකුණන්නෙකි. සතර මහා භූතයන්ගේ ගුණයෙන් ගස් වැල් හා සතුන්ගේ වැඩීම හා නැසීම සිදුවන්නාක් මෙන් යෞවන-ධන-සැප -බල යන සතර ලෝකයාගේ අර්ථානර්ථ දෙකට ම හේතු වේ” යනාදිය එහි කවියට නැඟුණු උපදෙස් කිහිපයකි.
අමරමෝලි මහතෙරුන් විසින් ම ලියන ලද භාවසන්නයකුත් සමඟ 1872 දී මුද්‍රණය කරවූ මේ පොත එකල ජනප්‍රිය කාව්‍යයක් වූ හෙයින් නැවත 1899 වැන්නෙහි ද මුද්‍රණයට පමුණුවා තිබේ.
(සංස්කරණය: 1974)
