ගොබ් ඉරිදා
කිතුනු ඇදහිල්ලට අනුව ක්‍රිස්තුස් වහන්සේගේ ජයග්‍රාහී උත්ථානය පාස්කු මංගල්‍යයයි. පාස්කු ඉරුදිනට හය දිනකට මත්තෙන් ක්‍රිස්තුස් වහන්සේ ජයෝත්සවයෙන් ජෙරුසලෙම් නුවරට පැමිණි දිනය කිතුණුවන් විසින් සිහිපත් කරනු ලබයි. එම සිදුවීම ශුද්ධ වූ සුවිශේෂයේ සඳහන් ප්‍රකාර 'බොහෝ දෙනෙක් තමන්ගේ සලු ද, අන් අය වතුපිටිවලින් කපාගත් කොළ අතු ද මග අතුළෝ ය' (ශුද්ධවර මාර්ක් 11: 8). එදා ජුදා ජනතාව රජකු ලෙස පිළිගනිමින් හෝසාන්නා යයි ජයඝෝෂා පැවැත්වූ දිනය ද මෙයයි. එම ඉරුදින ගොබ් ඉරිදා නමින් හැඳින්වේ.
මෙය ක්‍රිස්තු භක්තිකයන්ගේ ශුද්ධ වූ සතියෙහි පළමු දිනයයි. මෙදින විශේෂයෙන් සපයා ඇති ගොක් කොළ ආසිරි ගැන්වීමෙන් පසුව පූජකතුමා පෙරටුකොට එම ගොක් කොළ ද රැගෙන පෙරහර පැවැත්වීම සිරිතයි. ඉනික්බිති ක්‍රිස්තුස් වහන්සේගේ දුක්ඛප්‍රාප්තිය හඬනඟා කියාපාමින් මෙනෙහි කිරීම ද සිදු කෙරේ.
ගොබ් ඉරිදා සමස්ත ක්‍රිස්තියානි ලෝකය ම තම තමනට ආවේණික චාරිත්‍ර මත මෙම පිළිවෙත පවත්වයි. පොදුවේ සෑම රටක් ම පාහේ තාල වර්ගයට අයත් අතු භාවිත කරමින් ක්‍රිස්තුස් වහන්සේගේ ජීවිතයේ එම අති විශේෂ අවස්ථාව සැමරීමට යුහුසුලු වෙති.
ගොබ් ඉරුදින පිළිවෙතින් පසුව ආසිරි ගැන්වූ ගොක් කොළ තම නිවෙස් කරා ගෙනයමින් කුරුසියේ හැඩරුව ඇතිවන ලෙසට සාදා නිවසෙහි විශේෂ තැනක තැන්පත් කොට ඉතා පූජනීය වශයෙන් සැලකීම කිතු බැතිමතුන්ගේ සිරිතයි. මෙම ගොක් කුරුසිය ඊළඟ වසරේ අලු බදාදා අලු ආලේපනය සඳහා පුලුස්සන්නට දෙව් මැදුරට නැවත භාරදෙන තුරු එයාකාර ව තැන්පත් කර තිබේ.
-බෙනඩික්ට් ජෝසප් පියතුමා-
