චෙස්ටර් ඇලන් ආතර්
(1830–86). ඇමෙරිකා එක්සත් ජනපදයේ 21 වැනි ජනාධිපතිවරයා වූ මොහු බැප්ටිස්ට් පූජකවරයකුට දාව 1830 ඔක්තෝබර් මස 5 වැනි දින වර්මොන්ට්හි පෙයාර්ඞ්පීල්ඩ් නම් ස්ථානයෙහි උපන්නේය. නිව්යෝක් ජනපදයේ ෂෙනෙක්ටඩි නගරයේ යූනියන් විද්‍යාලයේ උගත් චෙස්ටර් 1848 දී ගෞරව උපාධි ලාභියෙක් විය. ඉන්පසු ගුරුවරයකු වශයෙන් සේවයට බට ඔහු එම වෘත්තියෙහි යෙදී සිටිය දී ම නීතිය හදාරන්නට පටන් ගත්තේය. 1853 දී ඔහු නිව්යෝක් නගරයේ නීති කාර්යාලයකට බැඳී සිට 1854 දී නීතිඥයකු වශයෙන් දිවුරුම් දුන්නේය. එක වහල් ප්‍රදේශයක සිට තවෙකකට ගෙනයනු ලබන වහල්ලු අතරමඟ නිව්යෝක් නුවර නැවතී සිටින කාලය නිදහස් මිනිසුන් බවට පැමිණෙතැයි යන්න සහ නිව්යෝක් නගරය තුළ දුම්රිය ගමනාගමනයෙහි යෙදෙන නීග්‍රෝජනයාට සුදු මිනිසුන්ට හා සමාන පහසුකම් ලැබිය යුතුය යන විනිශ්චයද්වය අධිකරණයෙන් ලබාගැනීම නිසා මොහු නීතිඥයකු වශයෙන් කීර්තියට පත්විය.
අභ්‍යන්තර යුද්ධ සමයේ දී චෙස්ටර් ඇලන් ආතර් නිව්යෝක් රාජ්‍යයේ යුද්ධ හමුදාවේ ක්වාටර් මාස්ටර් ජනරාල් නම් වූ උසස් ධුරයෙහි කටයුතු කළේය. මෙම ධුරයේ වැඩ කිරීමෙන් පසු යළිත් මඳ කලක් පෙරළා නීතිඥ වෘත්තියෙහි වැඩ කළ මොහු 1871 නොවැම්බර් මස නිව්යෝක් වරායේ ප්‍රධාන තීරුබදු අයකැමි ධුරයට පත් කරන ලද නමුත් 1878 ජනවාරි 11 වැනිදා එම ධුරයෙන් ඉවත්කරන ලදි.
1880 රිපබ්ලිකන් පාක්ෂිකයන්ගේ ජාතික සම්මේලනයට නියෝජිතයකු වශයෙන් චෙස්ටර් ද යවන ලදී. එහි දී ජනාධිපතිධුරයට තරඟ කිරීම සඳහා ජේම්ස් ඒ ගාර්ඞ් පීල්ඩ්ගේ ද උපජනාධිපති ධුරයට චෙස්ටර් ඇලන් ආතර්ගේ ද නම් යෝජනා කරන ලදී. ජනාධිපති ධුරයට පත් වූ ගාර්පීල්ඩ් 1881 සැප්තැම්බර් මස මරුමුවට පත් කරන ලදින් ආතර් ජනාධිපති ධුරයට පත්විය.
1884 දක්වා ජනාධිපති පදවිය දැරූ මොහු 1886 දී නිව්යෝක් නුවර දී කලුරිය කෙළේය.
(සංස්කරණය: 1965)
