ජාමදග්න්‍ය

සිංහල විශ්වකෝෂය වෙතින්
වෙත පනින්න: සංචලනය, සොයන්න

ජමදග්නිගේ පුත‍්‍ර පරශුරාම සඳහා යෙදෙන පිතෘ පාර්ශ්වයෙන් ලද නාමයයි. ඔහු විෂ්ණුගේ දශ අවතාර අතුරින් සවැනි අවතාරය ලෙස සැලකේ. ස්වකීය ආයුධය ලෙස පොරොවක් (සංස්. පරශු) කරේ දරා සිටින හෙයිනි හේ පරශුරාම ලෙස ද හැඳින්වෙන්නේ. උපතින් ම සාම්ප‍්‍රදායික බ‍්‍රාහ්මණයකු වූ ඔහු ක්ෂති‍්‍රයයනට වෛර කරන්නකු වූ අතර ඔවුන් පොළෝ තලයෙන් අතුගා දමන්නට කි‍්‍රයා කළ රණශූරයෙක් විය.

ඔහුගේ පියා වූ ජමදග්නි (ජමද්+අග්නි) භෘගු පරපුරෙන් පැවැත ආවකු වූ අතර, ඍචීක හා සත්‍යවතීගේ පුත‍්‍රයා ද විය. වේදය හසළ දත් ධාර්මික ජීවිතයක් ගත කළ ජමදග්නිට බිරිඳ වූ රේණුකාට දාව පුත්තු පස්දෙනෙක් වූහ. දිනක් ස්නානය පිණිස නදියට ගිය රේණුකා එහි දිය කෙළිමින් සිටි ගන්ධර්ව යුවලක් පෙමින් වෙළී සිටිනු දැක ඔවුනට ඊර්ෂ්‍යා කරමින් අපවිත‍්‍ර චේතනාවන් සහිතව ආපසු ආශ‍්‍රමය කරා පැමිණියා ය. ඇයගේ රාගනිඃශි‍්‍රත ස්වරූපය දුටු, ක්‍රෝධයේ මූර්තියක් වූ ජමදග්නි අතිශය කෝපයට පත් ව ඇයගේ හිස ගසා දමන ලෙස සිය පුතුනට අණ කෙළේ ය. මුල් පුත්තු සිව්දෙනා එම සාහසික කි‍්‍රයාව සිදු කරනු නොහැකි ව පියාගේ අණට අවනත නොවූහ. එහෙත් කනිෂ්ඨයා වූ පරශුරාම සිය පියාට දැක්වූ සුපුරුදු සුවචභාවය ප‍්‍රදර්ශනය කරමින් සිය පොරොවෙන් මවගේ හිස ගසා දැමී ය. එම කි‍්‍රයාවෙන් පියාගේ කෝපය සංසිඳිණ. සිය පුතු ගැන පැහැදුණු ජමදග්නි ‘කැමැති වරයක් ගනු’යි පුතුට පැවසී ය. කරුණාවෙන් තෙත් වූ ළයින් යුතු පරශුරාම වරය වශයෙන් ඉල්ලා සිටියේ සිය මවට යළිත් ජීවිතය ලබා දෙන ලෙස ය. එම ඉල්ලීමට වහා එකඟ වූ ජමදග්නි ඇයට යළිත් ජීවිතදානය දුන්නේ ය.

ඊට කලකට පසු, මාහිෂ්මති නගරයේ සිට හෛහය දේශය පාලනය කළ කාර්තවීර්ය හෙවත් සහස‍්‍රාර්ජුන රජ ජමදග්නිගේ අසපුවට ගොස් ඔහුගේ කාමධේනුව සොරා ගෙන ගියේ ය. මේ වන විට අසපුවෙන් බැහැර ගොස් සිට ආපසු පැමිණි පරශුරාම ඒ බව දැනගත් වහා ම කාර්තවීර්ය හඹා ගොස් සටන් කොට ඔහු ඝාතනය කෙළේ ය. ඒ බව ඇසූ ඔහුගේ පුත්තු මහත් කෝපයට පත් ව අසපුව වෙත දිව ගොස් එවේලේ එහි තනි ව හුන් ජමදග්නි දුන්නෙන් විද මරා දැමූහ. එවේලේ ජාමදග්න්‍ය (පරශුරාම) අසපුවේ නොසිටියේ ආපසු අසපුවට පැමිණි පරශුරාම සිය පියාගේ මරණය ගැන මහත් සේ කම්පාවට පත් ව, සමස්ත ක්ෂති‍්‍රය වංශය ම පොළොවෙන් අතුගා දමන බවට සපථ කෙළේ ය. ඔහුගේ එම අධිෂ්ඨානය ඉෂ්ට කැරගත් බව පැවැසේ. ඔහු සම්පූර්ණ ක්ෂති‍්‍රය පරපුර ම 21 වතාවක් පෘථිවියෙන් තුරන් කර දමන ලද බව කියැවේ. එහෙත් අවසානයේ දී, යම්තම් සොළොස් හැවිරිදි වයස් ව සිට දශරථ පුත‍්‍ර රාම විසින් මෙම ක්ෂති‍්‍රය ඝාතකයා පරාජය කරන ලදි. වරක් කාර්තිකේයගේ (ස්කන්දගේ) බල පරාක‍්‍රමය ගැන ඊර්ෂ්‍යාවෙන් පෙළුණු ඔහු කෞඤ්ච පර්වතය සිදුරු කළ බව ද පැවැසේ. ඔහු ‘චිරජීවීන්’ සත්දෙන අතුරින් එකකු බවත් ඔහු අද වනතුරුත් මහේන්ද්‍ර පර්වතයේ තපස් රකිමින් සිටින බවත් හිනදූහු විශ්වාස කරති.

(‘චිරජීවී’ යනු සදා නොමියෙන ලෙස හින්දු භක්තියන් විසින් සලකනු ලබන සත්දෙන වන අශ්වත්ථාමන්, බලි, ව්‍යාස, හනූමාන්, විභීෂණ, කාම හා පරශුරාම සඳහා යෙදෙන සමූහාර්ථවාචී නාමයයි.)


වෝල්ටර් මාරසිංහ

"http://encyclopedia.gov.lk/si_encyclopedia/index.php?title=ජාමදග්න්‍ය&oldid=587" වෙතින් සම්ප්‍රවේශනය කෙරිණි