ඩොනල්ඩ් උබේසේකර
(1880-1957) සුප්රකට සමාජශෝධකයකු ද ගත්කරුවකු ද වූ මෙතෙමේ ව්යවස්ථාදායක මන්ත්රණ සභාවේ මන්ත්රීවරයකුව සිටි ජේ.පී. උබේසේකර මහතාගේ දෙවැනි පුත්රයාය. මෙතෙමේ ධනවත් ඉඩම්හිමියකු මෙන් ම සුප්රකට ක්රීඩකයෙක් ද වූයේය.
1880 මැයි මස 22 වැනි දින වේයන්ගොඩ බටදොළ වළව්වේ දී උත්පත්තිය ලැබූ මොහුගේ මව ශ්රීමත් සොලමන් ඩයස් බණ්ඩාරනායක මහතාගේ දෙටු සොහොවුරිය වූවාය. මොහුට හිල්ඩා උබේසේකර නමින් සහෝදරියක් ද ජේ.පී. උබේසේකර (මහමුදලි ශ්රීමත්) නමින් වැඩිමහල් සහෝදරයෙක් ද ස්ටැන්ලි උබේසේකර නමින් බාල සහෝදරයෙක් ද වූහ. සහෝදරිය ශ්රීමත් පෝල් ඊ. පීරිස් මහතා හා සමඟ විවාපත් වූවාය. 1906 දී ජොහානා ඊඩිත් පෙරේරා කුල කාන්තාව හා සමඟ විවාහප්රාප්ත වූ ඩොනල්ඩ් උබේසේකරට පුත්තු සිව් දෙනෙක් ද දූවරු දෙදෙනෙක් ද වූහ.
සාන්ත තෝමස් විද්යාලයෙහි හා රාජකීය විද්යාලයෙහි මූලික අධ්යාපනය ලැබූ ඩොනල්ඩ් උබේසේකර උසස් අධ්යාපනය සඳහා කේම්බ්රිජ්හි ත්රිත්ව විද්යාලයට ඇතුළු වූයේය. එහි දී විශේෂයෙන් නීති ශාස්ත්රය හා දේශපාලන විද්යාව ද ආචාරධර්මය ද හදාළේය. පසුව ලන්ඩනයේ ඉනර්ටෙම්පල් නීති විද්යාලයට බැඳුණු හේ 1903 දී බැරිස්ටර් විභාගයෙන් සමත් විය.
එංගලන්තයේ සිට ආපසු පැමිණි ඩොනල්ඩ් උබේසේකර කොළඹ ශ්රේෂ්ඨාධිකරණයෙහි අධිනීතිඥයකු ලෙස නීතිඥ වෘත්තියෙහි යෙදුණේය. එංගලන්තයේ දී බොක්සිං ශුරයකු හැටියට නම් දරා සිටි හේ ලංකාවේ එම ක්රීඩාව ජනප්රිය කිරීමට විශේෂ උනන්දුවකින් කටයුතු කෙළේය.
හෙතෙම ලංකාවේ කෘෂිකර්ම සමාජය, ලංකාවේ තුරඟ තරඟ සමාජය, රාජකීය යටත් විජිත ආයතනය, එංගලන්තයේ රාජකීය කෘෂිකර්ම සමාජය ආදි ආයතන රාශියක ම සාමාජිකත්වය දැරුවේය; ලංකාවේ පැරැණි සිරිත් විරිත් හා සභ්යත්වය ආරක්ෂා කිරීමේ පරමාර්ථයෙන් ලංකා සමාජ ප්රතිසංස්කරණ සමාජය නමින් සංගමයක් පිහිටුවාලීමෙහි ද පුරෝගාමීව ක්රියා කෙළේය. එම සංගමයේ සභාපති වශයෙන් සිටි ඩොනල්ඩ් උබේසේකර මහතාත් එහි ලේකම් ධුරය දැරූ ශ්රීමත් ඩී.බී. ජයතිලක මහතාත් ලංකා ඉතිහාසය, සිංහල භාෂාව හා දෙමළ භාෂාව ලංකාවේ සියලු පාසැල්වල අනිවාර්ය විෂයයන් විය යුතු යයි තරයේ කියා සිටියහ. ප්රමාණවත් ඉතිහාස ග්රන්ථ නොමැතිකම නිසා ලංකා ඉතිහාසය අධ්යාපන පරිපාටියෙන් ඉවත් කිරීමට සිදු වූ බව එවක සිටි අධ්යාපන අධ්යක්ෂවරයා විසින් ප්රකාශ කරනු ලැබූ කල්හි ඩොනල්ඩ් උබේසේකර මහතා ලංකා ඉතිහාසය හදාරා වර්ෂ කීපයක් තුළ දී සවිස්තර ඉතිහාස ග්රන්ථයක් ද සම්පාදනය කෙළේය. එපමණක් නොව හේ ලංකාවේ ආයුර්වේද වෛද්ය ක්රමය නඟා සිටුවීමෙහි ලා නොමඳ සේවයක් ඉටු කෙළේය. මොහු වෘත්තියෙන් නීතිඥයකු වුව ද වැවිලිකරුවකු වශයෙන් ලබා සිටියේ උසස් කීර්තියකි. හේ ලක්දිව කෘෂිකර්ම කටයුතු දියුණුකිරීමෙහි ලා අපමණ වෙහෙස දැරීය.
කෝට්ටේ සුළු නගර සභාවේ සභාපති වශයෙන් අවුරුදු 13ක් ම ක්රියා කළ ඩොනල්ඩ් උබේසේකර මහතාගෙන් කොච්චියාවත්ත නමින් දන්නා ප්රදේශයට විශාල සේවයක් ඉටු විය. ඔහු විසින් මුඩුක්කු ඉවත් කොට ගොඩනැඟිලි ආදිය ඉදි කොට එය වෙන ම නගරයක් බවට පමුණුවන ලදි. පසුව එම ප්රදේශය ‘උබේසේකරපුර’ යනුවෙන් නම් කරනු ලැබිණි.
ඩොනල්ඩ් උබේසේකර මහතා 1957 ඔක්තෝබර් 1 වැනි දා හෘදයාබාධයකින් කලුරිය කෙළේය.
(සංස්කරණය: 1970)
