තකාඕ

(Mount Takao). ජපානයේ ටෝකියෝහි සිට කි.මී. 50ක් ෆුජියාමා (බ.) දෙසට වන සේ පිහිටි හචියෝජි නගරයේ මෙයිජි නො මෝරි කුවන්සි ජාතික උද්‍යානයේ පිහිටි මු.ම. මී. 559ක් උස කන්දකි. උප නිවර්තන සහ සමශීතෝෂ්ණ දේශගුණික කලාප වෙන් වන සීමාවේ පිහිටියෙන් බහුවිධ පාරිසරික තත්ත්වයන්ගෙන් පොහොසත් ය. ස්ථානීය වශයෙන් අගනුවරාසන්න වුවත් ගන වනයෙන් ගැවසීගත් මෙකඳු බෑවුම්හි තුරුලතා විශේෂ 1,200කට අධික සංඛ්‍යාවක් වැඩේ. මෙහි පර්ණාංග ශාක විශේෂ පමණක් 140කි. කෘමි විශේෂ මෙන් ම වල් ඌරන් සහ වඳුරන් ඇතුළත් සත්ත්ව විවිධත්වය විශාල ය.

ජපානයේ ප්‍රධාන සංචාරක ආකර්ෂණ ස්ථානයක් වන මෙය, පා ගමන් සඳහා ප්‍රකට ය. වාර්ෂිකව මි. 2.5ක සංචාරක පිරිසක් මෙහි පැමිණෙති. මෙය නැරඹීමට කේබල කාර (Cable car/Aerial lift) සහ ෆනීක්‍යුලර (Funicular) ආධාරයෙන් ද පැමිණීමේ පහසුකම් සලස්වා තිබේ. මෙකඳු මුදුනේ සිට ෆුජියාමා" ටෝකියෝ (බ.) සහ යොකොහාමා (බ.) දෙසට මනස්කාන්ත දර්ශන විවර වේ. මෙම කන්දෙහි පිහිටි, 744 දී ඉදිකෙරුණු සහ 14 වන සියවසේ දී ප්‍රතිසංස්කරණය කෙරුණු ශින්ගොන් (Shingon) නිකායට අයත් ටකාවෝ-සන් යකුවෝ-ඉන් යුකි-ජි (Takao-san Yakuo-in Yuki-ji) නමැති බෞද්ධ විහාරයයි. ජපාන ජනප්‍රවාදයන්හි පැනෙන විපත් පිටුදැකීම හා බැඳුණු තෙන්ගු (Tengu) ඇදහිල්ල ද, නුබ ගැබෙහිත් පොළෝ තලයෙහිත් වසන දේව කොට්ඨාසයක් වන කාමි (Kami) විශ්වාස සමඟ සුළු වශයෙන් ද මේ කන්ද බැඳී තිබේ.

ටකාවෝ-සන් යකුවෝ-ඉන් යුකි-ජි ආරාමවාසී යමබුෂි (yamabushi) භික්ෂූන් විසින් මාර්තු මාසයේ දෙවන ඉරිදා දිනයෙහි මෙකඳු පාමුල සංචාරකයින් ද ඇතුළු දහස් ගණනකගේ සහභාගිත්වයෙන් සයිතෝ ගොමා-කු (Saito Goma-ku) නමින් අග්න්‍යෝත්සවයක් පවත්වනු ලැබේ. මෙහි දී ජනයාගේ බලාපොරොත්තු සහ ප්‍රාර්ථනා සටහන් කළ නදේගි නමින් හැඳින්වෙන කූරු දවාලනු ලැබෙන අතර භික්ෂූන් වහන්සේ අනුව යමින්, ඇදහිලිවන්තයෝ සිය පවුලේ, ශරීරයේ සහ ආධ්‍යාත්මයේ ආරක්ෂාව පතා ගිනි පාගති. ගින්න සියලු කුණු කිලි දවා හැර මිනිසුන් පවිත්‍ර කරන බව විශ්වාසයයි.

කර්තෘ: රන්ජන දේවමිත්‍ර සේනාසිංහ

(සංස්කරණය නොකරන ලද - 2022)