දවට

(Carallia brachiata (Lour.) Merr) යන උද්භිද විද්‍යාත්මක නාමයෙන් හැඳින්වේ. ශ්‍රී ලංකාවේ ඇතැම් ප්‍රදේශවල දැවට නමින් හඳුන්වනු ලබන්නේ ද මෙම ශාකයයි. තෙලෙඟු බසින් මෙම ශාකය කරල්ලි යනුවෙන් නම් කෙරේ. දවටවල ඝන නාමය (Carallia) මෙම තෙලෙඟු වචනයෙන් බිඳී ආවකි.

දවට බහු වාර්ෂික කාෂ්ටීය ශාකයකි. ද්වී බීජ පත්‍රී (DICOTYLEDONS) වේ. ප්‍රධාන කඳෙන් සහ අතුවලින් පැන නඟින වායව මුල් සමූහ වශයෙන් දැකිය හැකි ය. මෙම මුල් පොකුරු නිසා දවට ශාකය පහසුවෙන් හඳුනාගත හැකි ය.

(RHIZOPHORACEAE) රයිසොෆෝරේසියේ නමැති උද්භිද කුලයට අයත් ය. මෙම කුලයේ ශාක පොදුවේ කඩොලාන පරිසරයට අනුවර්තන දක්වයි. දවට ශාකයේ ඇති වායව මුල් ලවණාධික වගුරු බිමෙහි වර්ධනය වීමට දක්වන අනුවර්තනයකි. දවට හොඳින් වැඩෙන්නේ තෙතමනය බහුල පරිසරයේ ය. ශක්තිමත් කාෂ්ටයක් (අරටුවක්) ඇති නිසා දැව වශයෙන් භාවිතා කළ හැකි හෙයින් ආර්ථික වටිනාකමක් ද ඇත.

(කර්තෘ: පී.ජී.ඩී. ප්‍රදීපා සේරසිංහ: 1997)

(සංස්කරණය නොකළ)