මුහම්මද් ඉබ්න් ජරීර් අල් තබරි

(838-923). පර්සියාවේ තබරිස්ථානයේ උපන් මෙතෙම හත්වැනි වියේ දී කෝරානය වන පොත් කෙළේය. අරාබිය, සිරියාව සහ මිසරය යන රටවල ශිල්ප හදාරමින් කල් ගෙවූ මෙතෙම බැග්ඩෑඩ් නුවර සිය නිත්‍ය වාසය කොට ගත්තේය. 'ශාන්තුවරයන් සහ රජුන් පිළිබඳ ඉතිහාසය' නම් අතිවිශාල ග්‍රන්ථය සම්පාදනය කිරීමෙහි හෙතෙම හතලිස් වසක් පුරා යෙදුණේය. ලෝකෝත්පත්තියෙහි සිට ක්‍රි.ව. 913 දක්වා විශ්ව ඓතිහාසික කරුණු දක්වන එයින් අද ශේෂව ඇත්තේ විශාල කාණ්ඩ දොළොසකුත් අර්ධයෙකි. මුල් කෘතිය එමෙන් දස ගුණයක් විශාලව පැවති බව පැවසේ. දෙවියන් ලොව නිර්මාණය කළ ආකාරය ඇතුළු බයිබලයේ එන කරුණු, පර්සියාවේ සැසේනියානු රාජ්‍ය ඉතිහාසය, යුදෙව් ඉතිහාසය, මහමත්තුමාගේ කාලය පිළිබඳ ඉතිහාසය සහ උමයියාද් සහ අබ්බාසිද් රාජපරම්පරාවන්ගේ ඉතිහාසය එහි එන කරුණුවලින් සමහරකි. මේ සියල්ල සම්පාදනය සඳහා පැරැණි පොත් සහ පුරාවෘත්ත හෙතෙම පිහිට කොට ගත්තේය.

(සංස්කරණය: 1965)