සින්නක්කරය
කිසිවෙකු විසින් තමන් සතු ඉඩමක් කිසිවෙකුට විකුණන විට ඒ බව සඳහන් කොට ලියා දෙන ලියවිල්ලට සින්නක්කර ඔප්පින්නය යන ව්‍යවහාරය පෘතුගීසීන්ගේ ලංකාවතරණයෙන් ඉක්බිතිව පහතරට පෙදෙස්හි වූ බව සලකනු ලැබේ. රෝමානු-ලන්දේසි නීතිය බලපෑ ඒ කාලයෙහි එම ලියවිලි ලිවීමේ බලය පල්ලියේ ගුරුන්නාසේ නම් විශේෂ නිලබල ලත් පිරිසකට පැවරී තිබිණ. එකී සින්නක්කරය නොහොත් ඔප්පින්නයට ව්‍යවහාර වු අනික් නමක් නම් ‘කලු මුද්දර ඔප්පුව’ යනුයි. එම ලියවිල්ලක ආදර්ශ පිටපතක් පහත දැක්වේ.
නො 5995 – වර්ෂ එකදාස් අටසිය දොලහක් වූ ජූලි මස දොලොස් වෙනි දිනට ලියවා දෙන වග නම්, ගනේගම පදිංචි වනිග ඩින්තාමණීමානි මොහොට්ටි ගෙයි දොන් කොස්තන්තීනු අප්පුහාමි යන මට ඕනෑ කාරණාවක් ගැන මගේ මුතුන් පරවෙනි මීපාවිට හරියෙ තිබෙන කැබිලිපිටිය යන කුඹුරෙන් මගේ පඟුවට ලැබී බුත්ති විඳ එන වී පස් කුරුණි බාගේ ඉඩම ක්‍රය සින්නේ විකුණන පිණිස ගන්නෝ කවුරුදැයි කියා සොයා ඇවිදිනා අතර එම ඉඩමේ පංඟුකාර සපුගොඩ වනිගචින්නාමානි දොන් සාමෙල් හෙට්ටි අප්පුහාමි විහින් ගන්වාය කී නිසා එසේ සේන්දුකර දෙන පිණිස මෙහි කී කුරුණි පහමාරේ ඉඩමට කීප දෙනෙක් ඉදිරියේ පිට දී නියම කළ අගය මෙවකට වටිනා මුදලෙන් පතාග පහළහයි එම මිල ගණන මුල කී මා විහින් හරි හැටි ගැන බලා බාර ගනිමින් දෙතුන් වෙනුව ම සින්න සින්නක්‍රය කොට සේන්දු කර දුන් නිසා මේ ගැන මම් මතුවට මමවත් මගෙන් පැවැත එන දරු මුනුබුරු මල් බෑ නෑසිය කොයි තරම් උරුමක්කාරයෙක් විසින්වත් මීට කිසි ආරවුලක් කරණ්ඩ කියන්ඩ නුපුළුවන් ලෙසට පොරොන්දුව මේ සින්නක්කර ඔප්පින්නය ලියවා අත්සන් කර වරක් කී දොන් සාමෙන් අප්පුහාමිට දුන්නේ ප්‍රථම කී දොන් කොස්තන්තීනු අප්පුහාමි යන මා විසිනි. .................. මීට සාක්ෂි,
සපුගොඩ කාරියවසන් කරණ ජයවික්‍රම ගමාච්චිල
මෙම ගම පාඬිප්පෙරුම ආරච්චිගෙයි නයිදිහාමි
ගතාරේ පදිංචි අතුරලියේ කන්කානම් ගම ගෙයි දොන් ජුවානිස්
අතුරලියේ පල්ලියේ දෙවෙනි ගුරුකම කරණ විජේවන්ත දෙස් දිනෙස් ද සිල්වා
මෙසේ මේ සින්නකර ඔප්පින්නය ලිවූ බවට අත්සක් කළේ දොන් ආබ්‍රහම් අතුරලියේ පල්ලියේ පළමුවෙනි ගරුන්නාන්සේ වම්හ.
මෙහි පෙනෙන සින්නකර ඔප්පිනයේ පිටපත සහ හැඳින්වී ගන්නා ලද්දේ 1961 ඔක්තෝබර මාසය වෙනුවෙන් නිකුත් වුණු ‘ශ්‍රී ලංකා’ සඟරාවෙනි. එම ලිපිය ලියා ඇත්තේ අකුරැස්සේ ධර්මවංශ සේපාල දහනායක විසිනි.
(පිටපත් කළේ: හපුගොඩ සුමනතිස්ස ස්ථවිර: 1961)
(සංස්කරණය නොකළ)
1961.12.08 දින
