හනුමා බන්ධනය
මෙය මන්ත්‍ර බලයෙන් හනුමා බන්ධනය කර කැමති දේ කරවා ගත හැකි මන්ත්‍ර කාව්‍යයකි. එය කළ යුතු අකාරය පැරණි තල්කොළ පොතක සදහන් වන්නේ මෙසේ ය. ගෙයක් ගොම ගා වියන් බැද තිර ඇද ඇඳක් එහි තබා එ් මතුපිට පිරුවට එලා එකසිය අට වර්ගයක් පළතුරු ද එකසිය අට වර්ගයක් දළු ද පස් වර්ගයක් කැවිලි ද නව වර්ගයක් මල් ද බුලත්, පුවක්, හුණු, විලද යන මෙකී දේ ද ඇද මත පුදා වදුරෙකුගේ හිස, මොළ, කැවුතු, කට්ටකුමන්ජල්, දුම්මල, හොද මිරිස් යන මේවා කුඩුකර දිෂ්ඨි මන්ත්‍රයන් සත්විටක් මතුරා කබලට දමා පුද භෝජනාදියට හා ගෙට දුම් අල්ලා හනුමා ගෙන්වන මන්ත්‍ර හත ජප කළ යුතුයි. ඒ වේලාවට ඇතුන් රංචුවක් ගස්ගල් කඩාගෙන එති. ඊට බිය නැති ව සිට මන්ත්‍රය මතුරා අත්පිඩි ගැසීමෙන් අවතාර නවතී. එකල නැවතත් ගෙන්වන මන්ත්‍ර හත ජප කරන විට වදුරන් පන්සියයකගේ පැමිණීම වේ. ඊට නියමිත මන්ත්‍රය මතුරා හූ කී විට වදුරෝ යත්. ඉන්පසු නැවතත් ගෙන්වන මන්ත්‍ර ජප කරන විට හනුමා එයි. එ් වේලාවේ භය නැතිව සිට නියමිත මන්ත්‍රය මතුරා පුද භෝජන කැපකර දිය යුතුයි. හනුමා පුද භෝජන අනුභව කර ශුභ අශුභ විචාරා කියයි. ඉන්පසු තමාට වුවමනා දේ කියා නියමිත මන්ත්‍රයන් හනුමා බන්ධනය කර තබා ගැනීමෙන් යකුත් එලවීම, සූනියම් ඉගිලවීම, යකුත් බැදීම ආදි ක්‍රියා සිත් වූ පරිද්දෙන් කළ හැකි ය. යකුත් එළවන විට මුලින් කී පුද භෝජන, උක්දඩු , අන්නාසි, තැඹිලි, රඹකැන් පුදා ගෙන්වන මන්ත්‍ර ජප කළ විට හනුමා පැමිණ යකුන් බැද දෙයි. මේ බන්ධනය හනුමාගේ රූපය ඉදිරිපිට තබා ජප කළ යුතුයි. බන්ධනය කරගත් අය මිය යන්ට තුන්මසක් තිබිය දී දිෂ්ටිය ඇරෙයි. හෙවත් හනුමා ඔහු අත්හැර යයි.
උධෘත: තල්කොළ පොතකින්
(කර්තෘ: ඩී.ආර්. සෙනෙවිරත්න: 1956)
(සංස්කරණය නොකළ)
