හැරියට් එලිසබත් බීචර් ස්ටෝව්
(Harriet Elisabeth Beecher Stowe) (1811.06.14-1896.07.01). ඇමරිකාවේ ප්‍රකට සමාජ සේවිකාවකි. ප්‍රසිද්ධ ලේඛිකාවක් ද වූ ඇය තම සහෝදරිය විසින් හාරට් ෆ්‍රඩ්හි පිහිටුවන ලද පාසලෙහි අධ්‍යාපනය ලබා එහි ම ආචාර්යවරියක් වූවා ය. කැල්වින් එලිස් ස්ටෝව් (Calvin Ellis Stowe) නමැති මහාචාර්යවරයකු සමඟ 1836 දී විවාහ දිවියට ඇතුළත් වූ ඕ සාහිත්‍ය සේවයේ යෙදුණේ තරුණ වියේ සිට ය. ඇය දරුවන් සත් දෙනෙකුගේ මවක් වූවා ය.
ජනප්‍රිය ග්‍රන්ථ කර්තෘවරියක ලෙස ප්‍රසිද්ධ වීමට ඇයට බොහෝ සෙයින් ඉවහල් වුයේ 'අන්කල් ටොම්ස් කැබින්' (Uncle Tom's Cabin) නමැති ග්‍රන්ථයයි. එය කොතරම් ජනප්‍රිය වී ද යත් භාෂා විසිතුනකට පරිවර්තනය කරනූ ලැබී ය. ඇමරිකාවේ වහල් විරෝධී අදහස් ඇවිස්සීමේ ලා එමගින් සිදුවූයේ ඉමහත් සේවයකි. හුදු සාහිත්‍ය කෘතියක් ලෙස නොව දේශපාලන ග්‍රන්ථයක් ලෙස සැළකිය හැකි මෙයින් විස්තර වන විෂයයට වඩා චරිත නිරූපනය කොට ඇති ආකාරය අද කවුරුත් විසිනුත් අගය කරනු ලැබේ. වහල් සේවය නමැති භයානක විපතින් ඇමරිකාව මුදවා ගැනීම සඳහා යෙදුණු බලවත් සටනේ දී මෙම ග්‍රන්ථය මගින් හැරියට් ස්ටෝව්ගෙන් ලැබුණු පිටුවහල අතිවිශාල ය.වරෙක ඇය හමු වූ ජනාධිපති ඒබ්‍රහම් ලින්කන් "ලොකු ම යුද්ධය කළ කුඩා ස්ත්‍රිය මැය" යැයි පැවසී ය. සමාජය හැඩ ගැස්සවීමේ බලාපොරොත්තුවෙන් ග්‍රන්ථ රාශියක් සම්පාදනය කළ ස්ටෝව් එංගලන්තයට ගොස් වහල් වෙළෙඳාමට විපක‍්ෂ ව ප්‍රසිද්ධ කථා පන්තියක් ම පැවැත්වූවා ය. වර්ෂයකට ග්‍රන්ථය බැගින් සම්පාදනය කොට ප්‍රසිද්ධ කළ ඈ තිස් වසරක් මුළුල්ලේ ම එම කාර්යයෙහි යෙදුණා ය.
85 වන වියේ දී ඇය හාර්ට්ෆර්ඩ් නිවසේ දී කළුරිය කිරීමෙන් වැදගත් ග්‍රන්ථ කර්තෘවර සමාජ සේවිකාවකගේ අවසානය සිදු විය.
(කර්තෘ: විමල් අබේසුන්දර)
(සංස්කරණය නොකළ)
