හෙල්විටි
(Helvetii). යකඩ යුගයේ අගභාගයේ සහ රෝම යුගයේ නූතන ස්විට්සර්ලන්තයට අයත් වන කලාපයේ ජීවත් වූවා සේ සැළකෙන සෙල්ටික් (Celtic) භාෂාව කතාකරන ජනකොට්ඨාසයකි. ජර්මන් ජාතික ආක්‍රමණිකයන්ගේ බලපෑම නිසා මොවුහු ක්‍රි.පූ 2 වන ශතවර්ශයේදී වුර්ටෙම්බර්ග් (Wurttemberg) නම් ප්‍රදේශයෙන් ඉවත් වී වර්තමානයේ වයඹ දිග ස්විට්සර්ලන්තයට අයත්, ජුරා කඳු අතර ප්‍රදේශයේ පදිංචියට පැමිණියහ. මෙම ජනකොට්ඨාසයට අයත් ටිගුරිනි (Tigurini) නම් කුඩා ගෝත්‍රයක් ක්‍රි.පූ. 107 දී ජූරා කඳුවැටිය තරණය කොට ඉන් ඔබ්බට ගොස් එම ප්‍රදේශයේ රෝම කොන්සල්වරයා පරාජයට පත් කළේ ය. ක්‍රි.පූ.102 දී මෙම ගෝත්‍රිකයෝ සිම්බ්‍රිවරුන් හා එක් ව ඉතාලිය ආක්‍රමණය කළහ. ආරම්භයේ දී ඔවුන් සටන් කරමින් ඉදිරියට ගිය ද ක්‍රි.පූ.101 වන විට ඔවුන්ට පසු බැසීමට සිදුවිය.
ක්‍රි.පූ. 61වන විටත් ජර්මන් ජාතිකයන්ගේ තර්ජනවලට ලක් ව සිටි ඔවුහු පසුව බටහිර ගෝල් දේශයට සංක්‍රමණය වීමට තීරණය කළහ. එහි ආණ්ඩුකාරයා ඔවුන්ට රෝම පළාත්වලට ඇතුල්වීමට ඉඩ දීම ප්‍රතික්ෂේප කළේ ය. ඔවුන් ජූරා කඳු තරණය කොට ඒඩුනන් (Aeduan) පළාතට පැමිණි විට ආණ්ඩුකාරයාගේ සේනාව ඔවුන් ලුහුබැඳ ගියහ. බිබ්‍රැක්ට් (Bibracte) අසල දී ඇති වූ සටනින් හෙල්විටිවරු පරාජයට පත්වූහ.
ඔගස්ටස් යටතේ හෙල්වෙටියාව ගැලියා බෙල්ගිකා (Gallia Belgica) හි කොටසක් බවට පත්විය. ඔවුන්ගේ ඇතැම් ඉඩම් ජනපද සඳහා යොදවා ගන්නා ලදී. නමුත් හෙල්විටි හමුදාවන් විසින් මුර කරනු ලැබූ බලකොටුවක් ඔවුන් සතු ව පැවතිණි. ඔවුන්ගේ අගනුවර වූයේ අවෙන්ටිකම් (Aventicum) නගරයයි.
රෝම කොලණියක් බවට පත් වූ ඇවෙන් ටිකම්හි දියුණු වෙ‍ෙළඳාමක් පැවැති බවට සාක්ෂි තිබේ. ක්‍රි.ව. 5 සියවස මැද භාගයේ දී මෙම දේශය අලමානී (Alamanni) යටතට පත්විය.
(කර්තෘ: දේවිකා ප්‍රියදර්ශනී එදිරිවීර: 1978)
(සංස්කරණය නොකළ)
