"ස්වර භේදය" හි සංශෝධන අතර වෙනස්කම්

12:17, 5 ජනවාරි 2024 වන විට නවතම සංශෝධනය

(Aphonia, Loss of Voice). වා, පිත්, සෙම්, විසම චර්යා, අපථ්‍ය ආහාර ගැනීමාදී කිසියම් හේතුවක් පාදක කොට ගෙන ඇති වන ශාරීරික අක්‍රමිකතාවක් හේතුවෙන් භාෂණයේ දී ඇතිවන අපහසුතාව මෙනමින් හැඳින්වේ.

නිදාන සම්ප්‍රාප්ති හා ලක‍්ෂණ

ඉතා උස් හඬින් බහුල ලෙස කථා කිරීම, විෂ්‍යාපය, බොටුවට පහර වැදීම ආදී අපථ්‍ය විහරණයෙන් කුපිත වූ වාතා දී දෝෂයෝ ස්වරවාහී ධමනීන් ඇසුරු කොට ස්වර භේදය උපදවත්. වා, පිත්, සෙම්, සන්නිපාත, ක්ෂයජ යයි ස්වර භේදය සවෑදෑරුම් ය.

වාතජ ස්වර භේදයෙන් පෙළෙන මිනිසාගේ මළ, මුත්‍ර, ඇස්, මුහුණ යන මේ ද්‍රව්‍ය හා තැන් කළු පැහැති වේ. රෝගියා කොටළුවෙකු මෙන් විකෘති හඬින් කථා කරයි. පිත්තජ ස්වර භේදයෙහි රෝගියාගේ මළ, මූත්‍ර, ඇස් හා මුහුණ කසාවන් වේ. කථා කරන විට ගෙලෙහි දාහය ඇති වේ.

ශ්ලේෂ්මජ ස්වර භේදයෙහි උගුර නිතර ම සෙමෙන් බැ‍‍‍දෙයි. කථා කරන විට ශබ්දය මඳ වශයෙන් නිකුත් වෙයි. සන්නිපාත ස්වර භේදයෙහි තිදොස්හි දැක්වුණු ලකුණු ඇතිවේ. ක්‍ෂය රෝගීයාට ද ස්වර භේදය සෑදේ. මහලුකමින් සෑදෙන ස්වර භේදය හා ක්‍ෂය රෝග හේතුවෙන් හටගන්නා ශරීර භේද අසාධ්‍ය වේ. අරුචිය, වමනය, තෘෂ්ණ හෙවත් පිපාසය, මූර්ඡා යන මේ උපද්‍රවයෝ ද වෙන් වෙන් වැ රෝගයන් වශයෙන් විස්තර කර තිබේ. මේ හැම ව්‍යාධියකට ම තනි වශයෙන් එක් එක් දෝෂයන් මුල් ව ද දෝෂත්‍රය ම කිපීමෙන් සන්නිපාතික වශයෙන් ද හඳුන්වා ඇත. මේ රෝග කිහිපය අන්‍ය රෝග තුළ උපද්‍රව වශයෙන් ද ආගන්තුක වශයෙන් ද වැළදෙති.

(කර්තෘ: පී.ඇම්.පී. අභයසිංහ: 1956)

(සංස්කරණය නොකළ)