ඇම්බැක්කේ අලංකාරය
ඇම්බැක්කේ දේවාලය (බ.) පිළිබඳ විත්තිය විසිතුරු ලෙසින් දැක්වෙන කුඩා කාව්ය ග්රන්ථයෙකි. දේවාලය කිරීමට හේතු වූ කරුණු ද එහි ලක්ෂණ ද කතරගම දෙවියන් කෙරෙහි ජනයා දක්වන භක්තිය ද කතරගම දෙවි සිය බිසෝ ගෝමර බංඩාරත් පුත් සපුමල් බංඩාර කුමරුත් කැටිව කතරගමින් මහපෙරහරින් පිටත්ව බදුල්ල ඌවේ කඩවත පසු කොට තලාතුඔය හරහා ඇම්බැක්කේ දේවාලයට පැමිණ එය පිළිගත් බව ද එවක් පටන් දේවාල පෙරහර පවත්වාගෙන එන බව ද මනහර ලෙසින් ග්රන්ථයෙහි දැක්වෙයි. කවියා දෙල්ගහගොඩ මුදියන්සේ නමැත්තකු බවත් ඔහු මේ කාව්යය රචනා කොට රජුට පිළිගැන්නූ බවත් පොතේ මුල සඳහන් වන “ඇම්බැක්කේ දේවාලය ගොඩනැඟීම සඳහා එවකට සිටි ප්රසිද්ධ කාව්යක්කාරයකු වූ දෙල්ගහගොඩ මුදියන්සේ රජහට දැක්වූ ඇම්බැක්කේ අලංකාරය” යන වැකියෙන් කියැවේ. පසු කල පිටපත් කිරිමේ දී එක් කැරුණු වැකියක් බව පැහැදිලිය. භාෂාව අනුව බලන කල ග්රන්ථ කාලය මහනුවර යුගයේ අවසානයෙහි යැයි සිතිය හැකිය. එකල කතරගම සිට බදුල්ල හරහා ගම්පළට වැටී තුබුණු මාර්ගයත් ජනයා අතර පැවති දේවභක්තියත් දේවාලයේ විත්තිත් දැනගැනීමට මෙය ප්රයෝජනවත්ය.
(සංස්කරණය: 1967)
