හෘද රෝගය
හෘද රෝගය දරුණු ව්‍යාධියෙකි. මෙහි ප්‍රභේද පසකි. ගුල්ම රෝගය වැළදීමට යෙදෙන අසමානහාර විහරණයන් ම හෘද රෝගයට ද හේතුවෙත්. හදිසියේ වන තැති ගැන්ම, ශෝකය, භය, වේගවත් වූ උස් හඩ ඉවසිය නොහැකි වීම, ශරීරය වේළුනාක් වැනි පීඩාව, මුලාව, ඇදුම, නිදි මැරීම යන මේ ලකුණු වාතිත හෘද රෝගයට අයත් වේ. අනික් හෘද රෝගයන්ට වඩා වාතජ හෘද රෝගයේ තියුණු වේදනාව හා ඇම්මත් ඇති වන්නේ ය. ශ්ලේෂ්මජ හෘද රෝගයාට ළමැද තදවීම, ගලක් පැටෙව්වාක් මෙන් බරක් දැනීම, බඩගිනි නොවීම, කිවිසීම, කෑරීම, අලස බව, අරුචිය යන මේ උපද්‍රව සහිත වූ ලකුණු පහළ වේ.
භ්‍රමය, මූර්ඡාව, දාහය, ඩහදිය ගැලීම, ඇඹුල් ඔක්කාරය, අම්ල පිත්ත රෝගයේ ලකුණු ය. වමනය, උගුරේ දුම් පැටලීම, සමෙහි කසාවත් බව, ජ්වරය යන මේ ලකුණු හා උපද්‍රව පිත්තජ හෘද රෝගයෙහි ඇති වන්නේ ය. වාතජ හෘද රෝගයෙහි වෙසෙසින් පුපුවේ හිස් බවත් සමඟ නිතර පවත්නා තියුණු වේදනාවක් ඇත.
ත්‍රිදෝෂජ හා කෘමිජ හෘද රෝග අතර ත්‍රිදෝෂජයෙහි දෝෂත්‍රයට ම අයත් ලකුණු පහළ වේ. කෘමිජ හෘද රෝගයෙහි වෙසෙසක් නම් බෙහෙවින් වමනය හා පළාවන් නේත්‍ර ඇතිවීම හා ඇදිරි දැක්ම ය. සෙම නැති මහ වියළීමත් ඇති වෙයි. හෘදය නිතර කියතකින් ඉරන්නාක් මෙන් දැනේ. කෘමිජ හෘද රෝගය වනාහි අතිභයංකර වූ මාරක ව්‍යාධියෙකැයි කියනු ලැබේ. එහෙයින් රෝගය ලක්‍ෂණ එකක් දෙකක් දුටුවහොත් පිළියම් කළ යුතු ය. මිනිසාගේ ප්‍රධාන මර්මය වූ හෘදය ක්‍රිමින් විසින් කා දැමීමෙන් ජීවිතය විනාශ වන්නේ ය.
ආශ්‍රිත ග්‍රන්ථ
අෂ්ටාඞ්ගහෘදයසංහිතා
(කර්තෘ: පී.ඇම්.පී. අභයසිංහ: 1964)
(සංස්කරණය නොකළ)
