අලිඛාන්
(? –1960). විසිවැනි ශතවර්ෂයේ ලොව විසූ ඉතා ප්‍රසිද්ධ, විනෝදකාමී ධනකුවේරයකු වූ මෙතෙමේ වර්තමාන (1960) අගාඛාන්තුමාගේ (බ.) පියා විය. මහමත්තුමාගෙන් පැවැත එන්නෙකැයි සලකනු ලැබූ හිටපු අගාඛාන්තුමාගේ පුත්‍ර අලිඛාන් කුමාරයා ඉස්මයිලි මුස්ලිම් නිකායට අයත් කෝටි සංඛ්‍යාත ජනයා විසින් පූජනීය පුද්ගලයකු හැටියට සලකනු ලැබීය. 1958 දී එක්සත් ජාතීන්ගේ මණ්ඩලයේ පකිස්ථාන නියෝජිත පදවියට පත් කරනු ලැබූ මෙතෙමේ එම මණ්ඩලයේ සාම ආරක්ෂක කොමිටියේ සභාපතිවරයා ද වූයේය. අලිඛාන් කුමරු සාමය සම්බන්ධයෙන් කළ කතා නිසා ඔහුට පුවත්පත්වලින් ලැබුණු ප්‍රශංසා බොහෝය.
මොහුට අවුරුද්දේ ඒ ඒ කාලය ගත කිරීමට පකිස්ථානය, ඉන්දියාව, එංගලන්තය, ප්‍රංසය, ඇමෙරිකාව ආදි රටවල ස්වකීය වූ විශාල මාළිගා තිබිණි. ලොව සිටි ඉතා ම ධනවත් රේස්-අශ්ව හිමියන් අතුරෙහි ද මෙතෙමේ ප්‍රධාන තැනක් ගත්තේය. අලි ඛාන්ගේ පෞද්ගලික වියදම මාසයකට රුපියල් දසලක්ෂයක් වී යයි කියති.
පළමුවෙන් විවාහ වූයේ ච’ස්ටන් සාමිවරයාගේ දුහිතෘවක වූ ද, දික්කසාද වූ කාන්තාවක් වූ ද ජෝන් ගිනෙස් නැමැත්තිය සමගය. දැන් අගාඛාන් පදවිය දරන්නේ එම විවාහයෙන් ලත් පුතුන් දෙදෙනාගෙන් වැඩිමාල් වූ කරීම්ය. අලිඛාන් දෙවෙනි වරට විවාහ වූයේ රීටා හේවත් නම් ලෝක ප්‍රසිද්ධ චිත්‍රපටි නිළිය සමඟය. රීටා හේවත් 1953 දී අලිඛාන්ගෙන් දික්කසාද වූවාය. ඉන්පසු විවාහ වීමට තීරණය කරගෙන සිටි බෙටිනා නමැති ප්‍රංස රූමතිය සමඟ ප්‍රංසයේ සමාජ ශාලාවක සිට මෝටර් රථයකින් ගමන් කරද්දී සිදු වූ රිය ගැටුමකින් 1960 මැයි මස 12 වැනි දා අලිඛාන්ගේ මරණය සිදු විය.
(සංස්කරණය: 1965)
