නාච්චදූව වැව

නාච්චදූව වැව

අනුරාධපුර නුවර වැවට දකුණු දෙස අනුරාධපුර-දඹුල්ල පාරේ ගල්කුලමට ආසන්නව පිහිටා තිබේ. වැවට අනුරාධපුරයේ සිට දුර සැතපුම් 11කි.

මෙහි වැව් බැම්ම අඩි 36ක් උස වේ. පතුලේ සිට උස ම තැන අඩි 55ක් උස් වේ. බැම්ම මුදුන අඩි 20ක් පළල ය. ඇල අඩි දෙක හමාරකට උස අඩි එක බැගින් බැම්ම දෙපස බෑවුම් වේ. බැම්මේ ඇතුල් පැත්ත රළ පහරින් සේදී නොයන සේ කුඩා ගල් අතුරා තනා තිබේ.

බැම්මේ දකුණු කොටසේ ගඟට ආසන්නව සොරොව්ව තනා තිබේ. ඊට වතුර ගැනීමට තැනූ බිසෝ කොටුව අඩි 10 අඟල් 10ක් පළල හා අඩි 12 අඟල් 6ක් දිග වේ. එහි වැව පැත්තේ බිත්තිය අඩි 11ක් ද අනෙක් බිත්ති අඩි 7ක් ද ඝනකමට සාදා ඇත. බිසෝකොටුවේ පතුල හා සතර බිත්ති අඩි 3ක් උසට ගල් අතුරා නිම කොට ඇති අතර ඉහළ බිත්ති ගඩොලින් සාදා ඇත.

වැව් බැම්මේ උතුරු කෙළවරේ වැඩි වතුර පිට කිරීම සඳහා වූ වාන ඉදිකර තිබේ. මෙය අඩි 167ක් දිග අඩි 44ක් පළල් වේ. එහි වැව පැත්ත ගල්කුට්ටි හා ගල් සක්ත යොදා සාදා හුණු බදාමයෙන් හොඳාකාර කපරාරු කර තිබිණි. ඉංග්‍රීසි ආණ්ඩුව මෙය 1906 දී අලුත්වැඩියා කරවී ය. ඊට පෙර වාන බැම්මට වඩා අඩි 14 අඟල් 2ක් උසින් ද විය. ඒ අනුව වැවේ විශාලත්වය අක්කර 2,015ක් ද ධාරිතාව ඝන අඩි කෝටි 52, 1/2ක් ද විය. අලුත්වැඩියාවෙන් පසුව වැවේ වතුර රඳන උස තවත් අඩි 8 අඟල් 3කින් වැඩි විය. ඒ අනුව වැවේ විශාලත්වය අක්කර 3,920ක් ද ධාරිතාව ඝන අඩි කෝටි 160ක් ද වූ බව පාකර් සඳහන් කරයි. පසුව කරන ලද තවත් ප්‍රතිසංස්කරණ නිසා වැව දැන් තවත් අක්කර 4,00ක් විශාල ය. එයින් කුඹුරු අක්කර 4,200ක් වගා කරනු ලැබේ.

මල්වතු ඔයෙන් මෙන් ම ජය ගංගාවෙන් බෙදී යන අතු ඇළකින් ද නාච්චදූව වැවට වතුර සැපයේ.

පාකර් මෙය මහසෙන් කර වූ මහාදාරගල්ල ලෙස හඳුන්වා දී එය මහසෙන් සමයට අයත් වැවක් ලෙස දක්වා තිබේ. එහෙත් එම අදහස වැරදි ය. මහාදාරගල්ලවාසී වනාහි මාදුරු ඔය පුරාමිගා වැව බවට දැන් හඳුනාගෙන තිබේ. දෙවන මොග්ගල්ලාන (531-555) රජු කර වූ පත්තපාසාමිතාවාසී යනු වර්තමාන නාච්චදූව වැව ලෙස ශිලාලිපි අනුව දැන් හඳුනාගෙන තිබේ.

(කර්තෘ: සෝමපාල ජයවර්ධන)

(සංස්කරණය නොකළ)

[[ප්‍රවර්ගය:]]